العودة إلي العمل أو الدراسة بعد فترة أجازة طويلة بتسبب حالة من الإكتئاب اسمها back to work blues بتحصل لما بنقارن بين حياة الفسح والسفر والبحر والنوم براحتنا خلال فترة الأجازة ونتخيل إننا هنرجع للصحيان بدري نروح محاضرات ونبعت إيميلات الشغل ونقابل عملاء.

وبما إن العودة للدراسة أو للعمل قرار لابد منه، دي خطوات ممكن تساعدنا نتخطى الطلعة الأولي:

1) لو إنت مسافر ارجع يوم بدري وفضي شنطتك واغسل الهدوم وابدأ شوف الإيميلات كده واحدة واحدة عشان تدخل في موود الشغل قبل ما تروح بكره 😀

2) بلاش ندخل في حالة إنكار ونقول كل حاجة زي الفل، إحنا متضايقين ونفسنا نكمل أنتخة في الأجازة وده مش هيحصل فاحنا متضايقين .. عادي .. واجه نفسك بالحقيقة المُرة 😀 ونخلي توقعاتنا واقعية .. يعني نقول مثلا هنبدء ندخل قي المُوود نهاية الأسبوع نقابل عملاء بقي ونرجع لطبيعتنا .. بس مش أول يوم.

3) نرجع أول يوم “اللي هو بكرة” نشتغل على خفيف، بلاش مواعيد كتير و to do list مليانة، كفاية نرجع نفتكر كنا بنعمل إيه قبل الأجازة ونخطط لأسبوعنا.

4) لو حضرتك مدير فبلاش اجتماع بداية الأسبوع بكرة، خليه يوم الثلاثاء أحسن عشان الناس أصلا مش مستحمله.

5) نعمل حاجة fun بعد أول يوم دراسة أو شغل، عشان نهون على نفسنا اليوم الصعب ده.

6) وآخر حاجة وأهم حاجة، تخطط للأجازة الجاية، امتى وهتعمل فيها إيه وتدور على عروض مثلاً، ده هيهون العودة كتير وهيعمل تحفيز إنك ترجع لدراستك وشغلك.

ملحوظة أخيرة: بلاش أي حد ياخد قرار يسيب شغله بعد فترة أجازة عشان وارد جداً القرار ميكنش راجع للشغلانة نفسها ولكن للحالة النفسية العامة بعد الأجازة.